Í dag, 25. september, fagnar leikskólinn Hjalli við Hjallabraut í Hafnarfirði 35 ára afmæli
—
Skólinn hefur, frá fyrsta degi, verið skóli þróunar og heldur áfram að vera það. Leikskólinn varð hinn fyrsti sinnar tegundar á Norðurlöndunum til þess að notast við kynjaskiptingu í barnastarfi til þess að stuðla að samfélagslegu jafnrétti. Stefnan var þróuð af Margréti Pálu Ólafsdóttur og samstarfsfólki hennar í skólanum og hefur stefnan fengið byr undir báða vængi síðan þá, en Hjallastefnan er iðkuð í 18 skólum víðsvegar um landið.
—
Hjalli er fæðingastaður menntastefnu sem leggur áherslu, umfram allt, á jafnrétti, lýðræði og sköpun. Á leikskólanum leggjast öll á eitt um að skapa kærleiksríkt umhverfi sem einkennist af mennsku, virðingu og hlýju. Orðfæri barna og starfsfólks litast af þessari virðingu og hlýju sem er alltumlykjandi.
—
Hugtakið kjörnun varð til á Hjalla og vísar það til leitarinnar að mikilvægasta innihaldinu í hverju ferli, að finna niðurstöðu eða lausn, fjarlægja hismi og einbeita sér að kjarna málsins. Þannig mætti segja að kjörnun á starfsemi Hjalla snúist um það að mæta hverju barni eins og það er, virða ólíkar þarfir aldurshópa, kynja og einstaklinga. Að hlúa á víðfeman hátt að velgengni allra.
—
Öllum þessum 35 árum síðar finnum við svo sterkt hversu mikilvægt það er að standa vörð um jafnrétti og kærleika, að hvert eitt og einasta mannsbarn á skilið að vera elskað og virt. Að hverju barni sé gefin kostur á að styrkja alla þá þætti sem þau búa yfir, óháð staðalímyndum.
—
Til hamingju elsku Hjalli, kæru vinkonur og vinir 
@ Myndin sýnir þegar fyrsta skóflustungan var tekin
